គណបក្សកុម្មុយនិស្តជប៉ុនជ្រើសរើស ស្ត្រីជាប្រធានបក្ស ដំបូងគេ
 |
គណបក្សកុម្មុយនិស្តជប៉ុន (JCP) បានជ្រើសរើសលោកស្រី តាមុរ៉ា តូម៉ូកូ ជាមេដឹកនាំស្ត្រីដំបូងគេរបស់ខ្លួន កាលពីថ្ងៃព្រហស្បតិ៍ ដោយជាក់ស្តែង ក្នុងក្តីសង្ឃឹម នៃការពង្រីកមូលដ្ឋានគាំទ្រ របស់ខ្លួន និងទាក់ទាញអ្នកបោះឆ្នោត ឱ្យកាន់តែទូលំទូលាយ។
សមាជិកសភាជាន់ខ្ពស់ តាមុរ៉ា អាយុ ៥៨ ឆ្នាំ ឡើងកាន់តំណែងជាប្រធានគណបក្ស នយោបាយ ដែលមានអាយុកាល ១០២ ឆ្នាំ ដែលចាស់ជាងគេ ក្នុងប្រទេសជប៉ុន បន្ទាប់ពីលោក ស៊ីអ៊ិ កាហ្ស៊ុអុ អាយុ ៦៩ ឆ្នាំ ដែលបានបម្រើការ នៅក្នុងតំណែងនេះ ចាប់តាំងពីឆ្នាំ ២០០០ មកម៉្លេះ និងជាប្រមុខ ដែលបានកាន់តំណែង យូរបំផុត ក្នុងចំណោមគណបក្សនយោបាយជប៉ុនធំៗ។
ការសម្រេចចិត្តនេះត្រូវបានធ្វើឡើង នៅថ្ងៃចុងក្រោយនៃសមាជបក្ស នៅទីក្រុង អាតាមិ ខេត្ត ស៊ីហ្ស៊ុអូកា។ ហើយ លោក ស៊ីអ៊ិ ត្រូវបានតែងតាំងជា ប្រធានគណៈកម្មាធិការកណ្តាលរបស់ JCP ដែលជាស្ថាប័នបង្កើតគោលនយោបាយសំខាន់ ដែលលោកនឹងបន្តមានឥទ្ធិពលខ្លាំង លើទិសដៅរបស់គណបក្ស។
